HAJIYA SADIYA SULEIMAN DA’U ALIYU TA YI GODIYA GA MAGOYA BAYA, TA BUKACE SU DA SU CI GABA DA HAKURI KUMA SU TANADI KATIN ZABE NA 2027

 

Hajiya Sadiya Suleiman Da’u Aliyu ta aike da sakon godiya da fatan alheri ga daukacin magoya baya, abokai da masu fatan alheri a kananan hukumomin Birnin Kudu da Buji bisa irin goyon baya, addu’o’i da karamcin da suke ci gaba da nuna wa iyalansu.

A cikin sakonta, ta bayyana matuƙar godiyarta ga al’umma bisa kauna, biyayya da jajircewar da suke nunawa, tana mai cewa irin wannan goyon baya ne ke kara musu kwarin gwiwar ci gaba da hidimtawa jama’a.

Ta kuma yi kira ga magoya baya da su ci gaba da kasancewa masu hakuri, hadin kai da zaman lafiya, tare da kaucewa duk wani abu da zai iya kawo rabuwar kai ko rashin jituwa a tsakanin al’umma.

Hajiya Sadiya ta jaddada muhimmancin katin zabe na dindindin (PVC), inda ta bukaci duk masu cancantar kada kuri’a da su tabbatar sun mallaki katin zabensu tare da kiyaye shi domin amfani da shi a babban zaben shekarar 2027.

Ta bayyana cewa ci gaban Birnin Kudu da Buji na bukatar hadin kan al’umma da cikakken shiga cikin harkokin dimokuradiyya, tana mai nuna yakinin cewa da taimakon Allah da goyon bayan jama’a, makomar mazabar za ta kasance mai albarka.

A karshe, ta yi addu’ar Allah Ya ci gaba da hada kan al’ummar Birnin Kudu da Buji, Ya ba su zaman lafiya, ci gaba da arziki, tare da gode musu bisa irin kauna da goyon bayan da suke ci gaba da nunawa.

“Ina kira gare ku da ku ci gaba da hakuri, hadin kai da addu’a. Haka kuma, ku tabbatar kun tanadi katin zabenku domin zaben 2027. Tare za mu ci gaba da gina makoma mai kyau ga al’ummarmu, In Sha Allah.”