KASUWAR HANNUN JARI TA NIGERIA NA SHIRIN SABON ZANGO — SHUGABAN NGX

 

Daga Umar Umb | Insight Tribune News

RIYADH, SAUDI ARABIA — 16 ga Satumba, 2026

Shugaban NGX Group, Alhaji (Dr.) Umaru Kwairanga, ya bayyana shirin Initial Public Offering (IPO) na matatar man fetur ta Dangote a matsayin wani muhimmin ci gaba da ke nuna yadda kasuwar hannun jarin Najeriya ke kara karfi da kuma samun karbuwa a duniya.

Da yake magana yayin wata hira da gidan talabijin a taron Fintech Money 20/20 Middle East da aka gudanar a Riyadh International Conference Centre da ke Saudi Arabia, Dr. Kwairanga ya ce shirin IPO na Dangote Refinery ya aika da sako mai karfi ga masu zuba jari na duniya cewa Najeriya na da kasuwar jari da za ta iya tallafawa manyan kamfanoni tare da jawo jarin dogon lokaci.

A cewarsa, muhimmancin IPO din bai tsaya kan girman cinikin kadai ba, domin yana nuna cewa manyan kamfanoni za su iya amfani da kasuwar hannun jarin Najeriya wajen samun jari, fadada mallakar hannun jari da kuma bai wa masu zuba jari na cikin gida da na kasashen waje damar cin gajiyar ci gaban kamfanonin.

> “Dangote Petroleum Refinery IPO wata muhimmiyar alama ce ta amincewa da kasuwar jari ta Najeriya. Yana nuna cewa manyan kamfanoni za su iya samun jari na dogon lokaci ta kasuwar jama'a, tare da bai wa ‘yan Najeriya da masu zuba jari na duniya damar shiga cikin tafiyar ci gaban kamfanin.”

Fadada Damar ‘Yan Najeriya Su Zuba Jari

Dr. Kwairanga ya kuma yi bayani kan kokarin ganin manyan kamfanonin da za su shiga kasuwar hannun jari sun kasance cikin saukin samu ga talakawa da kananan masu zuba jari.

Ya bayyana cewa yanzu masu zuba jari na iya shiga cikin wasu tallace-tallacen hannun jari ta hannun stockbrokers, bankuna da wasu hanyoyin dijital da aka amince da su, abin da ya kara saukaka samun damar shiga kasuwar.

Ya ce manufar ba wai kawai kawo manyan kamfanoni kasuwa ba ce, har ma da tabbatar da cewa talakawan Najeriya, musamman matasa da masu fara zuba jari, za su iya shiga cikin damar da ci gaban manyan kamfanoni ke samarwa.

Karfafa Dangantakar Zuba Jari Tsakanin Najeriya da Kasashen Gulf

Da yake magana kan damar jawo karin masu zuba jari daga kasashen Gulf zuwa Najeriya, Dr. Kwairanga ya bayyana bangarorin harkokin kudi, sadarwa, makamashi, ababen more rayuwa da masana'antu a matsayin muhimman fannoni masu cike da damarmaki.

Ya ce masu zuba jari na kasa da kasa suna duba abubuwa kamar saukin shiga kasuwa, yawan cinikin hannun jari, tabbas na tsarin dokoki da kuma saukin shigar da fitar da jari kafin su yanke shawarar zuba kudi.

A cewarsa, Najeriya ta samu ci gaba wajen inganta harkokin kasuwar musayar kudaden waje, damar shiga kasuwa da kuma ingancin tsarin ciniki.

Ya kuma bayyana cewa shirin komawar Najeriya cikin FTSE Russell Frontier Market Index a ranar 21 ga Satumba, 2026, na daga cikin muhimman abubuwan da ke nuna sauye-sauyen da ake samu a kasuwar.

Kare Masu Zuba Jari a Zamanin Dijital

Dr. Kwairanga ya kuma jaddada muhimmancin kare masu zuba jari a daidai lokacin da amfani da wayoyin hannu da hanyoyin zamani ke kara yaduwa wajen shiga kasuwannin hada-hadar kudi.

Ya ce gaskiya, tsari mai inganci da ilimantar da masu zuba jari suna da matukar muhimmanci wajen gina amincewa da kasuwar.

Ya bayyana cewa NGX Regulation (NGX RegCo) na taka muhimmiyar rawa wajen sa ido kan ayyukan kasuwa, aiwatar da dokoki da kuma samar da hanyoyin magance koke-koken masu zuba jari.

> “Fasaha na iya saukaka zuba jari, amma amincewa ita ce ginshikin kowace kasuwar jari mai nasara. Dole ne samun dama da kariya su bunkasa tare.”

Ya kuma shawarci sabbin masu zuba jari da su yi amfani da hanyoyin da aka amince da su tare da samun cikakken bayani kafin yanke shawarar zuba jari.

Sabon Babi Ga Kasuwar Jari ta Najeriya

A karshe, Dr. Kwairanga ya bayyana cewa shirin IPO na Dangote Refinery ya wuce batun wata babbar mu'amalar kasuwanci kawai, domin yana iya zama wani muhimmin mataki wajen nuna karuwar balagar, juriyar aiki da kuma kwarewar kasuwar jari ta Najeriya a fagen kasa da kasa.

Yayin da Najeriya ke shirin komawa FTSE Russell Frontier Market Index tare da ci gaba da aiwatar da sauye-sauyen kasuwa, ana sa ran karin bude kofa ga masu zuba jari na cikin gida da na kasa da kasa.

— Insight Tribune News