Dr. Bala Wunti Ya Shiga Kwamitin Tattara Goyon Bayan Masu Ruwa da Tsaki na APC

 An naɗa fitaccen ɗan siyasa kuma jagoran al’umma, Dr. Bala Maijama’a Wunti, a matsayin mamba na Kwamitin Tattara Goyon Bayan Masu Ruwa da Tsaki (Stakeholders’ Mobilisation Committee) na Kwamitin Yaƙin Neman Zaɓen Shugaban Ƙasa na jam’iyyar APC.

Nadin nasa na kunshe ne cikin jerin sunayen mambobin kwamitocin yaƙin neman zaɓen shugaban ƙasa da jam’iyyar APC ta fitar a ranar Asabar, 22 ga Agusta, 2026, a wani mataki na ƙara ƙarfafa shirye-shiryenta gabanin babban zaɓen shugaban ƙasa na shekarar 2027.

Masu sharhi kan harkokin siyasa sun bayyana cewa zaɓen Dr. Wunti ya nuna yadda jam’iyyar ke amincewa da irin gudunmawar da yake bayarwa wajen haɗa kan jama’a, wayar da kan masu goyon baya da kuma ƙarfafa tsarin siyasa a matakin ƙasa da jihohi.

Dr. Wunti ya kasance ɗaya daga cikin fitattun jiga-jigan APC da suka taka muhimmiyar rawa wajen ƙarfafa ayyukan jam’iyyar, musamman ta fuskar haɗin kai, tallafa wa al’umma da kuma ƙarfafa gwiwar magoya baya. Haka kuma, an san shi da ayyukan jin ƙai da ci gaban al’umma da suka shafi ilimi, lafiya, tallafa wa matasa da marasa galihu.

Masu goyon bayansa sun bayyana nadin a matsayin abin alfahari ga jihar Bauchi da Arewa maso Gabas baki ɗaya, tare da bayyana cewa ƙwarewa, gogewa da nagartar Dr. Wunti za su taimaka wajen cimma manufofin kwamitin.

Ana sa ran kwamitin zai yi aiki wajen tattara goyon bayan manyan masu ruwa da tsaki daga sassa daban-daban na ƙasar nan domin tabbatar da nasarar jam’iyyar APC a zaɓen shugaban ƙasa mai zuwa.

Nadin Dr. Bala Wunti ya ƙara tabbatar da matsayinsa a matsayin ɗaya daga cikin manyan jagororin siyasa da ci gaban al’umma da ke da tasiri a Najeriya.