BUA Foods Ta Samu Ribar Naira Biliyan 292 A Rabin Farkon Shekarar 2026

 Kamfanin "BUA Foods Plc" ya bayyana cewa ya samu ribar bayan haraji (Profit After Tax) da ta kai Naira biliyan 292.27 a cikin watanni shida na farkon shekarar 2026, wanda ya nuna ƙarin kashi 12 cikin 100 idan aka kwatanta da Naira biliyan 260.10 da aka samu a makamancin lokacin shekarar 2025.

Rahoton kuɗaɗen kamfanin ya nuna cewa duk da raguwar kudaden shiga da kashi 16 cikin 100 zuwa Naira biliyan 765.12 daga Naira biliyan 912.51 a shekarar da ta gabata, kamfanin ya samu nasarar ƙara ribarsa sakamakon ingantaccen tsarin gudanarwa, rage kashe kuɗaɗe da kuma bunƙasa ayyukan samarwa.

Haka kuma, ribar kafin haraji (Profit Before Tax) ta ƙaru da kashi 14 cikin 100 zuwa Naira biliyan 314.90, yayin da ribar gudanar da ayyuka (Operating Profit) ta kai Naira biliyan 320.50, wanda ke nuna ƙarfin tsarin kasuwancin kamfanin duk da ƙalubalen tattalin arziƙin da ake fuskanta.

Shugaban Kamfanin BUA Foods, Ayodele Abioye, ya bayyana cewa nasarar da aka samu ta samo asali ne daga tsauraran matakan sarrafa kashe kuɗi, inganta hanyoyin samar da kayayyaki da kuma kyakkyawan tsarin gudanar da harkokin kasuwanci. Ya ƙara da cewa kamfanin zai ci gaba da mai da hankali wajen faɗaɗa kasuwanci da ƙara yawan tallace-tallace a rabin na biyu na shekarar 2026.

Masana harkokin tattalin arziƙi sun bayyana wannan sakamako a matsayin wata babbar nasara ga BUA Foods, musamman a lokacin da kamfanoni da dama ke fuskantar matsin tattalin arziƙi da hauhawar farashi. Wannan ci gaba ya sake tabbatar da matsayin kamfanin a matsayin ɗaya daga cikin manyan kamfanonin sarrafa abinci mafi ƙarfi a Najeriya.

Insight Tribune News