NYCN TA YI KIRA GA GWAMNATIN TARAYYA TA ƘARA ƘAIMI WAJEN MAGANCE MATSALAR TSARO A AREWACIN NIGERIYA

NYCN TA YI KIRA GA GWAMNATIN TARAYYA TA ƘARA ƘAIMI WAJEN MAGANCE MATSALAR TSARO A AREWACIN NIGERIYA A yayin da Najeriya ke bikin Ranar Dimokuraɗiyya ta 12 ga Yuni, Mataimakin Shugaban Ƙasa na Ƙungiyar Matasan Najeriya (NYCN), Umar Lauya, ya yi kira ga Gwamnatin Tarayya da ta ƙara himma wajen magance matsalolin tsaro da suka addabi jihohin Arewacin ƙasar nan. A cikin saƙonsa na Ranar Dimokuraɗiyya, Umar Lauya ya bayyana cewa hare-haren 'yan bindiga, ta'addanci, garkuwa da mutane, da sauran ayyukan tashin hankali na ci gaba da barazana ga rayuka da dukiyoyin al'umma, tare da haddasa ƙaura, dakushe harkokin ilimi, da raunana tattalin arziki a yankin. Ya nuna damuwa kan yadda mata da yara ke ci gaba da fuskantar wahalhalu sakamakon rashin tsaro, yayin da al'ummomi da dama ke rayuwa cikin fargaba da rashin tabbas. “Dimokuraɗiyya ba za ta bunƙasa yadda ya kamata ba sai an samu zaman lafiya, adalci da tsaro. Saboda haka muna kira ga gwamnati, hukumomin tsaro da sauran masu ruwa da tsaki da su ɗauki matakai masu gaggawa da inganci domin dawo da zaman lafiya, kare rayuka da dukiyoyi, da kuma dawo da amincewar jama'a,” in ji shi. Hakazalika, ya jaddada muhimmancin ƙarfafa matasa ta hanyar ilimi, samar da ayyukan yi, da shirye-shiryen haɗa kai da al'umma, yana mai cewa waɗannan matakai na daga cikin hanyoyin da za su taimaka wajen magance matsalolin tsaro na dogon lokaci. A ƙarshe, ya taya al'ummar Najeriya murnar zagayowar Ranar Dimokuraɗiyya tare da addu'ar samun zaman lafiya, haɗin kai da ci gaba mai ɗorewa a ƙasar. — Umar Umb Bauchi Insight Tribune News