Gwamnatin Tarayya Ta Kaddamar da Sabon Tsarin IPPIS Don Sauƙaƙa Ayyukan Ma’aikata

 Gwamnatin Tarayyar Najeriya ta ƙaddamar da ingantaccen tsarin IPPIS Employee Self-Service Application, wani sabon tsarin zamani da zai bai wa ma’aikatan gwamnati damar gudanar da harkokin ma’aikatansu cikin sauƙi da sauri ta hanyar fasahar zamani.

An gabatar da sabon tsarin ne a yayin bikin Makon Ayyukan Gwamnatin Tarayya na 2026 da aka gudanar a Abuja, inda Shugabar Ma’aikatan Gwamnatin Tarayya, Hajiya Didi Esther Walson-Jack, ta bayyana cewa tsarin zai kawo ƙarshen wahalhalun da ma’aikata ke sha wajen sabunta bayanansu, neman hutu, samun takardun albashi da sauran ayyukan HR.

Ta ce sabon tsarin zai ba ma’aikata damar shiga bayanansu kai tsaye, duba matsayinsu, neman izini, da samun muhimman bayanai ba tare da dogaro da dogon tsarin birokrasiya ba.

Haka kuma, ta buƙaci ma’aikatan gwamnati su rungumi amfani da fasahar zamani domin inganta aiki, gaskiya da saurin gudanar da ayyukan gwamnati.

A nasa jawabin, babban jami’in kamfanin Soft Alliance and Resources Limited, Mista Olusola Abiodun, ya bayyana cewa sama da ma’aikata 600,000 a dukkan Ma’aikatu, Hukumomi da Cibiyoyin Gwamnati (MDAs) za su amfana da wannan sabon tsari.

Sabon tsarin zai ba ma’aikata damar:

- Neman hutu ta yanar gizo.

- Sauke takardun albashi (Payslips).

- Karɓar saƙonnin taya murna na ranar haihuwa da ranar cika shekarun aiki.

- Samun sabbin sanarwa da dokoki cikin lokaci.

Masu ruwa da tsaki sun bayyana cewa wannan ci gaba zai taimaka wajen rage jinkiri, ƙara inganci, da bunƙasa ayyukan gwamnati a Najeriya.

Insight Tribune News